ភ្នំពេញ៖ អតីតនាយករដ្ឋមន្ត្រីកម្ពុជា សម្តេចតេជោ ហ៊ុន សែន សោកស្តាយចំពោះតួអង្គពិតក្នុងប្រវត្តិសាស្រ្តបានទទួលមរណភាពដែលមិនអាចទស្សនារឿង «កូនប្រុសក្រោមពន្លឺព្រះចន្ទពេញបូណ៌មី» ក្រោយរឿងប្រវត្តិសាស្ត្រមួយនេះថតចប់ និងបានដាក់បញ្ចាំងនៅកញ្ចក់ទូរទស្សន៍ និងតាមបណ្តាញសង្គមនានា។
បើតាមសម្តេចតេជោ តួអង្គពិតប្រាកដដែលបានទទួលមរណភាពមានដូចជា លោក សុខ សារឿន សម្ដេច ហ៊ុន ណេង អ្នកគ្រូពេទ្យ តាំង លី និងប្អូនថ្លៃស្រីសម្ដេចតេជោ។
សម្តេចតេជា ថ្លែងនៅក្នុងពិធីបិទកញ្ចក់កាមេរ៉ាថតខ្សែភាពយន្តភាគរឿង «កូនប្រុសក្រោមពន្លឺព្រះចន្ទពេញបូណ៌មី» នារសៀលថ្ងៃទី០៩ ខែតុលា ឆ្នាំ២០២៣ថា៖ «ខ្ញុំពិតជាសោកស្តាយជាមួយនឹងតួអង្គ ៤នាក់ ដែលបានមរណភាពកាលក្នុងរយៈកាលនៃការថតរឿងនេះ ទី១ មេបញ្ជាការ លោក សុខ សារឿន កាលពេលដែលចាប់ផ្តើមថតគាត់នៅរស់ ទី២ បងប្រុសរបស់ខ្ញុំគឺ ហ៊ុន ណេង ទី៣ អ្នកគ្រូពេទ្យ តាំង លី ឯទី៤ គឺប្អូនថ្លៃពៅរបស់ខ្ញុំ។ ឥឡូវរឿងបានកើត ប៉ុន្តែគាត់មិនបានមើលរឿងសម្តែងជាតួអង្គរបស់គាត់នោះទេ»។
គូសបញ្ជាក់ថា រឿង «កូនប្រុសក្រោមពន្លឺព្រះចន្ទពេញបូណ៌មី» គឺរៀបរាប់អំពីជីវប្រវត្តិស្នេហា និងការតស៊ូរំដោះជាតិរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងសម័យប៉ុលពត។ រឿងនេះមានចំនួន ៩៦ភាគ ដែលចំណាយពេលថតជាង ១ឆ្នាំ ដែលចំណាយថវិកាជាង ៥លានដុល្លារអាមេរិកដែលជាថវិកាពីសម្តេចតេជោផ្ទាល់៕